Concello de Valdoviño

O Concello informa á veciñanza de que a unidade móbil do Centro de Transfusión de Galicia desprazarase ó municipio este martes. Estará diante da casa consistorial en horario de mañá –de 10 a 14 horas- e de tarde –de 16 a 21 horas-.
 
Calquer persoa maior de 18 anos, que pese máis de 50 quilos e non padeza nin teña padecido enfermidades transmisibles polo sangue (VIH, hepatite B ou C,...), pode doar. A doazón de sangue é un acto sinxelo que permite a moitas persoas solucionar o seu problema de saúde e mesmo salvar a súa vida.
 

Seguindo as instruccións da Xefatura Territorial da Consellería de Sanidade, o Concello informa de que “o regato Forcadas non está incluído no censo oficial de zonas de baño de Galicia”. A comunicación da Xunta, remitida vía fax ó Concello, ten lugar despois da última analítica da mostra recollida por Augas de Galicia neste espazo. Efectuada o 3 de setembro, detecta niveis altos de microcistinas.

Atendendo as peticións do centro, e na liña de mellora das instalacións, o Concello de Valdoviño vén de concluír os traballos de pintado de toda a segunda planta do CPI Atios, aulas e pasillos. Nas primeiras estancias, os operarios municipais tamén procederon á retirada dos armarios empotrados, moi deteriorados polo paso do tempo e na actualidade sen apenas uso, o que tan só reducía o espazo das aulas.

O Concello de Valdoviño informou esta mañá de que o próximo luns, 10 de setembro, abrirase o prazo de inscrición nas diferentes actividades da Escola Municipal de Música. A programación inclúe música en movemento para nenos e nenas de 3 a 5 anos, e guitarra clásica e eléctrica, piano, percusión e canto moderno, para nenos e nenas a partir de 6 anos e persoas adultas.
 

Os veciños e veciñas, nenos e maiores, que tomaron parte durante os meses de verán nos cursos de natación organizados polo Concello no marco do programa municipal OcioSol 2018 despediron a actividade a semana pasada cunha gran festa de fin de curso na piscina da Saíña.