I Torneo Municipal de Fútbol Feminino Concello de Valdoviño

O campo O Lameiro de Vilaboa acollerá o vindeiro domingo 25 de agosto a primeira edición do Torneo Municipal de Fútbol Feminino Concello de Valdoviño. Así o avanzou esta mañá o concelleiro de Deportes, Sergio Saavedra, que invitou á veciñanza a seguir o encontro que enfrontará aos equipos do CD Rosalía de Vilaboa e ao Amistade de Meirás. Será a partir das 18 horas con entrada libre e de balde ao campo.
 
Nesta liña, Saavedra destacou o auxe do fútbol feminino no municipio nos últimos anos, tal e como se constata coa recente constitución dos equipos locais de Vilaboa e Meirás.
 
Precisamente, o concelleiro apuntou que o Concello busca con este torneo recoñecer e promocionar o fútbol feminino no municipio, ao tempo que augurou unha longa vida ao trofeo.